Se Ralph Youri Chevry, Konsèy Prezidansyèl tranzisyon an lonmen nan Meri Pòtoprens kòm Majistra vil la. Eske se lòt moun ki pa genyen oubyen gen yon rezon menm pou se ansyen majistra soti 2016 pou rive 2020 an ki tounen ankò ? Se kesyon sa a anpil moun ap poze paske majistra sa a te pote l kareman nan tèt gwoup fantòm 509. Yon gwoup ansyen ak nouvo polisye swadizan yo t ap revandike bonjan kondisyon travay ak salè men se te yon gwoup atoufè ki kreye anpil pwoblèm vyolans ak destriksyon nan kapital la.
Si plizyè dirijan fantom 509 tankou Nènèl Cassy ak Ralph Youri Chevry tounen sou sèn politik la ankò. Sa vle di gen anpil chans pou fantom 509 reprann sèvis li tou. Sitou gen anpil lòt chèf ki te toujou la ap paweze tankou Pierre Esperance direktè RNDDH la. Detoutfason pouvwa ki la a jounenjodia se pouvwa pa yo, yo pap vin destabilize l tankou yo te konn fè anvan.
Se nan mwa fevriye 2021, yo te arete Chevry nan Repiblik Dominikèn kote misye te kouri al kache lè lapolis te swadizan mete manda dèyè l pou asasina, tantativ touye moun, destriksyon pwopriyete piblik ak prive epi ak asosyasyon kriminèl. Pierre Esperance te ekri yon lèt voye bay dirijan Dominiken yo, pou mande yo tanpri pa ekstrade chèf la paske lavi l pap ansekirite an Ayiti.
Minis lajistis epòk la mèt Lucmane Delile te deklare karebare epòk sa a, gwoup fantom 509 la, se yon gang ame ki responsab simen laterè nan peyi a. Se yon gwoup teworis sanfwanilwa! Dayè chef gang Vitel’homme Innocent fè konnen tou li se yon manm fondatè Fantom 509 ansanm ak mèt Andre Michel, Ariel Henry ak anpil dirijan nan Sektè Demokratik Popilè a.
