Claudine Gay, prezidan Inivèsite Harvard la, anba gwo presyon devan Komite Edikasyon ak Travay Chanm Repibliken Etazini an, blije anonse demisyon l madi 2 janvye 2024 la. Se pa ti kras akizasyon ki te tonbe sou do l, pou denigre l sou kapasite l esitou kritik konsènan temwayaj li pandan yon odyans devan repibliken yo nan Kongrè meriken an.
Madam lan anonse l ap kite sa, li pa kapab ankò. Se depi aprè Reprezantan Eta Nouyòk la, Elise Stefanik, te mande l : èske “apèl pou jenosid jwif yo” vyole kòd konduit enstitisyon l ap dirije a ?
Pou yo, li pa t reponn klè kon dlo kòk, san ekivok, kesyon sa a. Se pou l te di wi! Tout apèl pou jenosid jwif sou lakou lekòl la, ta konstitye yon vyolasyon grav politik konduit enstitisyon an.
Men eske se sa vre ki lakòz tout deblozay sa yo, tout eskonbrit sa yo kont li, jouk li blije kouri kite jòb madoulè a ?
Kounye a tout moun dwe aprann konnen gen jòb ou jwenn fòk ou dakò devan Leta peyi isit pou pwoteje jwif yo, nan santiman antisemitis k ap grandi atravè monn lan, menm lè se Palestinyen yo ki plis viktim, men se Jwif Izrayèl yo k ap bonbade pèp Palestinyen an pou w pwoteje.
